انتفاضة الشجر

أنت يا بني من سنين

لمّا انزرعت في طين بلادي

واترويت من نيل عنيها

ميَّه حلْوه سلسبيل

كنت ناوي تطرح الخير اللي فيك

توهبه من جيل لجيل

لكنِ انت فِضلت واقف

كبَّروك

وانت واقف

طرَّحوك

وانت واقف

مثل باقيت الشجر

واقفين سنين

أنت يا بني

فيه كتير زيك شجر

يفرش الضلة شمال

يفرش يمين

زى ما الريح تأمره

وانت واقف في انتظار

صحوة قرار

مين هايفهمني؟

ومِنِّي يستفيد ؟

شرط ينفع بيَّا غيره

بالعدالة

والعداله في إيد جهاله

يحققوها بالرزالة

يقطعوا الفرع اللي مدد فوووووووق

قبل ما يطرح ثماره

يضربوا بيه اللي ينطق

أو يقول: الصح فين؟!

انت فاكر ليك إماره

انت مين انت عشان ترفع عنيك ؟!

انت من ضمن الحثاله

إن أكلت اللقمة من إيدي

توطي لي على إيدي بمحبة وشكرانيه

واذا قلت كاني واللا ماني لقمتك هاتكون هناك

في صنايق البقية

اللي برمي فيها فضلة أكلتي

مع بصقتي

طبعا ف منديلي الورق

أو حتى ترجيعي اللى زاد في معدتي

يا دي القرف

الشجر صعبت عليه نفسه

فميّل وانجرف

معقول أنا أبقى شجر

وأعيش كده من غير شجر

مع الجهالة والغجر

قام الشجر لمّ الشجر

مدّد جذوره وانفجر

آهوطاح في وش اللي فجر

وقال كفايا

انت عيشتك من لحايا

وانت تقوي من عصايا

وانت تدَّاري ورايا

فوقوا بقى وصحصحوا

 حبة بالكياسة

بعد شهرين انتخابات الرياسة

وانت في الكرسي مِتبت

طب ماتعملني الحراسة

بدال حراسة

عشش البوم في دروبها

واستقر

وإن قلنا لا.. يضحكوا

ويقولوا ده الحسد ،

ودا كله قرّ

يحكمونا بالحديد

ويقولولك دول عواله

انت ناسي قبل ما تقعد هناك

موش كنت واحد مننا ؟!

واللا انت حاله

ليه بتنسوا انتوا مين ؟!

لما تتمكن وتعمل لك سياج

تبقى قمة في البسالة

موش هانرجع

إلا وفي عبي معايا كل حقى

حتى لو كسَّرت حُقي

وانت فاكر حقي صعب

لما اقول تغيير قانون دستور بلادي يبقى صعب ؟!

واللا اقول ليه الطواريء والقضاء ع المفسدين دا يبقى صعب ؟!

صلحولنا العيشه حبة !

شغلونا يبقى صعب ؟!

حتى لو فلفصت حبة

بكرة تخضع في تعاسه

بس يومها ماضمنكش

هاتبقي مني

واللا لاجيء بالسياسة

يابت يا اسكندرنية

إيه الجمال ده إيه الدلال ده

يابت يا اسكندرنية

الفجر صابحة تشمي اليود

تبقي شديدة وعافية

صفاري ساعة عصرية

في نسيمها تمشي بحرية

علي رمل بحرك وبرقة

تتمشي حافية يا صبية

ولما يطلع فى مزاجك

بترمي روحك في الميه

يا سمكه انت يا بلطية

جنية واللا مخاوية

عشان تقولي الحدوتة

بسلاسة وبروح رياضية

*****

دى مصر فعلا موالك

احكى وقولي اللي ف بالك

واحنا معاك وبنشارك

وحفظينا الأغنية

ومصر فعلا أم الكون

حراسها فوق الميت مليون

مهما تعلم في السربون

لترابها عاشق وبهية

وإن أى سايح جه بيتها

يشرب من مية قلتها

مشيتْ في دمه بسرعتها

يحفظ أصول المصرية

وبنت بحري يا جمالها

لما تقسم موالها

ع الشط تفرش لنا شالها

يحلا الكلام الملاغية

يابت يا اسكندرنية

احساس جميل

احساس جميل وأنا جايالك

والقلب مليان بخيالك

وبمني روحي بسؤالك

عاملت إيه قول في غيابي

***

واتمني تقولي وحشتيني

وكنت باتمني تجيني

إن شالله حتى تعاتبيني

أفرح وأقول زيدي عتابي

***

وأنا برضه أقولك ياعيوني

واحكي لك شوقي وشجوني

والحب المكتوب في جبيني

وازاي منسيني اصحابي

***

ولما جيت مالقيتش ضياك

وحرمت عينية من لقياك

القلب قال أنا هاستناك

وافرح في قربك بشبابي



****

بحيرة قارون

يا ميه صافيه في بحيره

ملاك ربي بالأســـــــرار

وفيك م السمــك أغيــار

وطلع من حشـــاك النار

وبرضه تروي عصفــورة

*****

يا ميه صافيه في بحيرة

على شطك مشى قارون

ومفاتيحه ذهب مضمون

يشلها رجاله عون وعون

خزاينه فيك محشورة

*****

يا ميه صافية في بحيره

على جبينك ينام مشتاق

وبرضه مرسى للعشاق

ولمـا تأذنـي بفـــــــراق

بتبقي غوله مسعورة

يا ميه صافيه في بحيره